ភ្នំពេញ ថ្ងៃទី 27 ខែមេសា ឆ្នាំ 2025 ៖ ធនាគារ ខេប៊ីប្រាសាក់ មានមោទនភាពដែលបានទទួលពានរង្វាន់ជ័យលាភីដ៏ខ្ពង់ខ្ពស់កម្រិតមាស “សហគ្រាសមួយជាសហគមន៍សុខសាន្តមួយ” ដែលទទួលស្គាល់ពីក្រសួងការងារ និងបណ្តុះបណ្តាលវិជ្ជាជីវៈ។

ពានរង្វាន់នេះ ត្រូវបានផ្ដល់កិត្តិយសប្រគល់ជូនដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងពិធីសំណេះសំណាលក្នុងឱកាសខួបអនុស្សាវរីយ៍លើកទី 139 ទិវាពលកម្មអន្តរជាតិ ក្រោមប្រធានបទ “រួមគ្នាដើម្បីការងារសមរម្យ និងកំណើនប្រកបដោយចីរភាព និងភាពធន់” ។

ធនាគារ ខេប៊ីប្រាសាក់ ទទួលបានពានរង្វាន់ដ៏វិសេសនេះ ដោយធនាគារបានបង្កើតនូវវប្បធម៌អនុលោមភាពតាមច្បាប់ និងបានចូលរួមចំណែកលើកកម្ពស់សុខដុមនីយកម្មនៃទំនាក់ទំនងវិជ្ជាជីវៈ។

ធនាគារ ខេប៊ីប្រាសាក់ ទទួលបានភាពខុសគ្នានេះសម្រាប់ការជំរុញវប៌្បធមនៃការអនុលោមតាម និងការរួមចំណែកដល់ការលើកកម្ពស់ទំនាក់ទំនងឧស្សាហកម្មប្រកបដោយសុខដុមរមនា។

ថ្នាក់ដឹកនាំម្នាក់នៃធនាគារ ខេប៊ីប្រាសាក់ បានមានប្រសាសន៍ថា “ធនាគារ ខេប៊ីប្រាសាក់ យើងខ្ញុំមានកិត្តិយសយ៉ាងក្រៃលែងដែលបានទទួលពានរង្វាន់ថ្នាក់ជាតិនេះ។ ប្រការនេះឆ្លុះបញ្ចាំងពីការខិតខំប្រឹងប្រែងរបស់យើងក្នុងការជំរុញបរិយាកាសការងារប្រកបដោយការគាំទ្រ បរិយាបន្ន និងសុវត្ថិភាពសម្រាប់បុគ្គលិកទាំងអស់” ។ លោកបានបន្ថែមទៀតថា ពានរង្វាន់នេះជានិមិត្តរូបនៃការជឿទុកចិត្ត ភាពជឿជាក់ និងភាពជានិយោជកគំរូ។

ជ័យលាភីនេះ ពង្រឹងបន្ថែមទៀតនូវការយកចិត្តទុកដាក់របស់ធនាគារ ខេប៊ីប្រាសាក់ ចំពោះការអនុវត្តអាជីវកម្មប្រកបដោយការទទួលខុសត្រូវ និងការរួមចំណែករបស់ខ្លួនក្នុងការកសាងសហគមន៍ប្រកបដោយភាពសុខសាន្ត និងផលិតភាព សម្រាប់ទីផ្សារការងារនៅកម្ពុជា។

ធនាគារ ខេប៊ីប្រាសាក់ ដែលមានបុគ្គលិកលើសពី 10,000 នាក់ បម្រើអតិថិជននៅទូទាំង 188 សាខាទូទាំងប្រទេស ផ្តល់ជូនឱកាសការងារប្រកបដោយនិរន្តរភាពយូរអង្វែង ព្រមដោយការវិនិយោគជាបន្តបន្ទាប់ក្នុងការអភិវឌ្ឍសមត្ថភាពបុគ្គលិក និងផ្តល់អត្ថប្រយោជន៍ទាំងផ្នែកហិរញ្ញវត្ថុ និងមិនមែនហិរញ្ញវត្ថុដល់គ្រប់បុគ្គលិក។ ខេប៊ីប្រាសាក់ មានកម្មវិធីតម្រង់ទិសអាជីពច្បាស់លាស់ និងផ្តល់រង្វាន់ដល់បុគ្គលិកដោយផ្អែកលើការអនុវត្តរបស់បុគ្គលិកម្នាក់ៗ និងប្រកាន់ខ្ជាប់នូវវប្បធម៌នៃការមិនរើសអើង លើកកម្ពស់បរិយាកាសការងារប្រកបដោយភាពវិជ្ជមាន និងគាំទ្រគ្នាទៅវិញទៅមក។ ធនាគារ ខេប៊ីប្រាសាក់ ស្វាគមន៍ចំពោះបុគ្គលិកដែលមានជំនាញផ្សេងៗ ដោយមិនសម្រាប់តែនិស្សិតបញ្ចប់ការសិក្សាផ្នែកធនាគារប៉ុណ្ណោះទេ ប៉ុន្តែថែមទាំងមកពីជំនាញផ្សេងៗដូចជា ឌីជីថល ព័ត៌មានវិទ្យា ធនធានមនុស្ស ដើម្បីចូលរួមរីកចម្រើន និងជោគជ័យជាមួយយើងផងដែរ។

ធនាគារ ខេប៊ីប្រាសាក់ បានប្រារព្ធពិធីសូត្រមន្តលើករាសីប្រោះព្រំទទួលពរជ័យ ពីព្រះសង្ឃ នៅការិយាល័យកណ្តាល និងសាខាទាំងអស់នៅគ្រប់ខេត្ត-រាជធានី ដើម្បីអបអរឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្តស័ក ព.ស. ២៥៦៩ ។

សូមទេវតាឆ្នាំថ្មី ប្រសិទ្ធពរជ័យ ជ័យមង្គល កើតមានដល់ សម្ដេច ឯកឧត្ដម ឧកញ៉ា លោកជំទាវ លោក លោកស្រី នាងកញ្ញា ព្រមទាំងក្រុមគ្រួសារ ទទួលបានសិរីសួស្ដី ជ័យមង្គល វិបុលសុខ មហាប្រសើរ និងរីកចម្រើនជាមួយគ្នាជានិរន្តរ៍។

សូមគោរពប្រសិទ្ធពរជ័យ បវរសួស្តី សិរីមង្គល វិបុលសុខ មហាប្រសើរ ជូនចំពោះ អតិថិជន សាធារណជន និយ័តករ និងភាគីពាក់ព័ន្ធទាំងអស់

ក្នុង​ឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ យើងខ្ញុំ​សូម​សម្ដែង​នូវ​ក្ដី​សោមនស្ស​ និង​សូមថ្លែង​នូវ​អំណរ​គុណ​យ៉ាង​ស្មោះអស់​ពី​ដួង​ចិត្តជូនចំពោះអតិថិជន និងភាគីពាក់ព័​ន្ធទាំងអស់នៃ ធនាគារ ខេប៊ីប្រាសាក់ ម.ក ​ដែលមានភក្ដីភាព ផ្តល់ទំនុកចិត្ត និងផ្តល់ការគាំទ្រ​យ៉ាង​កក់​ក្ដៅ​។ យើងខ្ញុំ​ក៏​សូម​គោរព​ថ្លែង​អំណរគុណចំពោះ​រាជរដ្ឋាភិបាល​ ជាពិសេស ធនាគារ​ជាតិ​នៃ​កម្ពុជា ក្រសួងពាណិជ្ជកម្ម និង​អាជ្ញាធរ​ដែនដី ដែល​បាន​គាំទ្រ​ដល់ប្រតិបត្តិការ​របស់​ធនាគារ ខេប៊ីប្រាសាក់ ម.ក រហូតមកដល់ពេលនេះ។

ធនាគារ ខេប៊ីប្រាសាក់ បាននិងកំពុងអភិវឌ្ឍខ្លួនបន្ថែមមួយ​កម្រិតទៀត​ ដើម្បីឆ្លើយតបតាម​តម្រូវការ​របស់ទីផ្សារ ពិសេសអភិវឌ្ឍសេវាហិរញ្ញវត្ថុឱ្យកាន់តែសម្បូរបែប ពង្រឹងការបម្រើសេវាជូនអតិថិជន ទំនើបកម្មបច្ចេកវិទ្យាព័ត៌មាន និងឌីជីថល ក្នុងគោលបំណងផ្តល់ភាពងាយស្រួល និងសុវត្ថិភាពខ្ពស់ជូនដល់អតិថិជន។

ក្នុងនាមភាគទុនិក ក្រុមប្រឹក្សាភិបាល គណៈគ្រប់គ្រង និងក្នុងនាមខ្លួនខ្ញុំផ្ទាល់ ខ្ញុំបាទសូមគោរពជូនពរ អតិថិជន សាធារណជន និយ័តករ អាជ្ញាធរ និងភាគីពាក់ព័ន្ធ​ទាំង​អស់ ព្រមទាំង​ក្រុម​គ្រួសារ សមប្រកបដោយ​ពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំ​បី​ឃ្លៀង​ឃ្លាត​ឡើយ។

សូមគោរពជូនពរពី លោក អ៊ុំ សមអឿន ប្រធាននាយកប្រតិបត្តិ ធនាគារ ខេប៊ីប្រាសាក់ ម.ក

កំពង់ឆ្នាំង៖ ធនាគារ ខេប៊ីប្រាសាក់ បានរៀបចំពិធីសម្ពោធដាក់ឱ្យប្រើប្រាស់ជាផ្លូវការ អគារបណ្ណាល័យទី 47 ស្ថិតនៅ សាលាបឋមសិក្សានិងអនុវិទ្យាល័យពន្លៃ ភូមិពន្លៃ ឃុំពន្លៃ ស្រុកបរិបូណ៌ ខេត្តកំពង់ឆ្នាំង ដើម្បីចូលរួមលើកកម្ពស់វិស័យអប់រំ និងបណ្ដុះវប្បធម៌អាន ក្រោមអធិបតីភាពដ៏ខ្ពង់ខ្ពស់ លោកជំទាវបណ្ឌិត សឿ សុជាតា អនុរដ្ឋលេខាធិការក្រសួងអប់រំ យុវជន និងកីឡា កាលពីថ្ងៃទី 4 ខែមេសា ឆ្នាំ 2025 និងមានការអញ្ជើញចូលរួមជាកិត្តិយសពីថ្នាក់ដឹកនាំ ធនាគារជាតិនៃកម្ពុជា មន្ទីរអប់រំ យុវជន និងកីឡាខេត្តកំពង់ឆ្នាំង ថ្នាក់ដឹកនាំស្រុក អាជ្ញាធរមូលដ្ឋាន ក៏ដូចជាលោកគ្រូអ្នកគ្រូ សិស្សានុសិស្ស និងប្រជាពលរដ្ឋយ៉ាងច្រើនកុះករ។

លោក លី ផល្លីន អភិបាលរង នៃគណៈអភិបាលស្រុកបរិបូណ៌ មានប្រសាសន៍ថា បណ្ណាល័យនេះផ្តល់ឱកាស ដល់សិស្សានុសិស្សដែលជាកូនចៅរបស់ប្រជាពលរដ្ឋនៅក្នុងសហគមន៍ឃុំពន្លៃរបស់យើងដើម្បីអាននិងសិក្សាស្រាវជ្រាវ។ ក្នុងនាមថ្នាក់ដឹកនាំអាជ្ញាធរដែនដី សូមកោតសរសើរ ធនាគារ ខេប៊ីប្រាសាក់ ដែលបានចូលរួមចំណែកជាមួយរាជរដ្ឋាភិបាលក្នុងការអភិវឌ្ឍធនធានមនុស្ស។ ហេតុនេះ លោកគ្រូអ្នកគ្រូ សិស្សានុសិស្ស និងសហគមន៍ត្រូវតែរួមគ្នាថែរក្សាធនធានដ៏មានតម្លៃនេះ ហើយសិស្សានុសិស្ស ត្រូវបន្តខិតខំសិក្សារៀនសូត្រដើម្បីអនាគត។

លោក អ៊ុំ សមអឿន ប្រធាននាយកប្រតិបត្តិ ធនាគារ ខេប៊ីប្រាសាក់ មានប្រសាសន៍​ថា យើងខ្ញុំមានសេចក្តីរីករាយដែលបានផ្តល់អគារបណ្ណាល័យជូនដល់សាលាបឋមសិក្សានិងអនុវិទ្យាល័យពន្លៃ។ បណ្ណាល័យនេះគឺជាឃ្លាំងផ្ទុកនូវចំណេះវិជ្ជាសម្រាប់ក្មួយៗក្នុងការស្រូបទាញយកដើម្បីពង្រឹងសមត្ថភាពរបស់ក្មួយៗបន្ថែមទៀត តាមរយៈការអាននិងការស្រាវជ្រាវពីសៀវភៅនានាដែលបានបំពាក់ក្នុងអគារនេះ។ លោកបន្តថា ការអប់រំ គឺជាមូលដ្ឋានគ្រឹះនៃការអភិវឌ្ឍ ហើយមកដល់ពេលនេះ ធនាគារ ខេប៊ីប្រាសាក់ បានសាងសង់អគារបណ្ណល័យចំនួន 47 ខ្នងរួមទាំងអគារបណ្ណាល័យដែលត្រូវបានសម្ពោធដាក់ឱ្យប្រើប្រាស់ជាផ្លូវការនៅថ្ងៃនេះ។ លោកសង្ឃឹមថា ក្មួយៗសិស្សានុសិស្សទាំងអស់នឹងខិតខំប្រឹងប្រែងអាន រៀនសូត្រ ដោយប្រើប្រាស់បណ្ណាល័យដែលបានផ្តល់ជូននេះឱ្យអស់លទ្ធភាពក្នុងការពង្រឹង និងពង្រីកចំណេះដឹងរបស់ក្មួយៗ ដើម្បីក្លាយខ្លួនជាសិស្សល្អ កូនល្អ ពលរដ្ឋល្អ និងចូលរួមចំណែកក្នុងការអភិវឌ្ឍសេដ្ឋកិច្ច និងសង្គមកម្ពុជា។

លោកជំទាវបណ្ឌិត សឿ សុជាតា អនុរដ្ឋលេខាធិការក្រសួងអប់រំ យុវជន និងកីឡា បាន​សាទរនិងថ្លែងអំណរគុណ​ចំពោះ​ការ​ខិតខំ​ប្រឹងប្រែង​របស់​ ធនាគារ ​ខេប៊ីប្រាសាក់ រួមចំណែកក្រសួងអប់រំ យុវជន និងកីឡា ក្នុងការលើកកម្ពស់ការអាននិងការសិក្សារបស់សិស្សានុសិស្ស តាមរយៈការសាងសង់អគារបណ្ណាល័យ។ បណ្ណាល័យនេះនឹងរួមចំណែកបណ្តុះធនធានមនុស្សពិតប្រាកដ ដែលជាធនធានដ៏អស្ចារ្យបំផុតសម្រាប់ប្រទេសយើង។ លោកជំទាវបណ្ឌិតសង្កត់ធ្ងន់ថា សិស្សានុសិស្សត្រូវឧស្សាហ៍ព្យាយាមខិតខំរៀនសូត្រ ហើយលោកគ្រូអ្នកគ្រូត្រូវបន្តពង្រឹងសមត្ថភាពជំនាញផ្ទាល់ខ្លួនបន្ថែមទៀតតាមរយៈការធ្វើស្វ័យសិក្សាស្រាវជ្រាវដោយខ្លួនឯងដើម្បីឱ្យការបង្រៀនកាន់តែមានប្រសិទ្ធភាព។

គិតមកដល់ពេលនេះ គម្រោងបណ្ណាល័យ ធនាគារ ខេប៊ីប្រាសាក់ បាន​ដាក់​ឱ្យ​ប្រើប្រាស់​ចំនួន​ 47 ​អគារ​ គ្របដណ្តប់​​លើ​ភូមិ​ចំនួន​ 505 ​ភូមិ ​ដែល​មាន​ចំនួន​គ្រួសារ​សរុប​ 110,951 ​គ្រួសារ​ ​មាន​ប្រជាជន​សរុប​ចំនួន​ 454,559 ​នៅ​ក្នុង​ 15 ​ខេត្ត ​រួម​មាន​ កំពង់ស្ពឺ​ ​កំពង់ចាម​ ​កណ្ដាល​ ​ព្រៃវែង​ ​កំពង់ធំ​ ​សៀមរាប​ ​តាកែវ​ ​ព្រះវិហារ​ ​បាត់​ដំបង​ ​ស្វាយរៀង​ ​បន្ទាយ​មានជ័យ​ ​កែប​ ​ពោធិ៍សាត់ ត្បូងឃ្មុំ និងកំពង់ឆ្នាំង ហើយ​មាន​សិស្សានុសិស្ស​ដែល​ទទួល​ផល​ផ្ទាល់​ពី​គម្រោង​បណ្ណាល័យ​នេះ​ចំនួន​ 172,554 ​នាក់​។​

ធនាគារ ខេប៊ីប្រាសាក់ មានក្ដីសោមនស្សរីករាយដែលបានចូលរួមបរិច្ចាគថវិកា ក្នុងគំនិតផ្តួចផ្តើមពង្រឹងវិស័យអប់រំនៅខេត្តកំពង់ធំ របស់សមាគមធនាគារនៅកម្ពុជា (ABC) សម្រាប់ការជួសជុលកែលម្អ សាលាបឋមសិក្សាចំនួន 12 អនុវិទ្យាល័យចំនួន 2 និងវិទ្យាល័យចំនួន 1 នៅក្នុងស្រុកប្រាសាទសំបូរ ខេត្តកំពង់ធំ។

ជាផ្នែកមួយនៃគំនិតផ្ដួចផ្ដើមនេះ ពិធីប្រគល់អំណោយជូនសាលាបឋមសិក្សា ច្រម៉ាស់ ត្រូវបានធ្វើឡើងនៅថ្ងៃទី 21 ខែមីនា ឆ្នាំ 2025 ដោយមានការអញ្ជើញចូលរួមពីលោកជំទាវ សាយ សំអាត ទេសាភិបាលរង ធនាគារជាតិនៃកម្ពុជា រួមជាមួយនឹងតំណាងសមាគមធនាគារនៅកម្ពុជា និងភាគីពាក់ព័ន្ធជាច្រើនរូបទៀត។

នៅក្នុងពិធីនេះផងដែរ ធនាគារ ខេប៊ីប្រាសាក់ បានចូលរួមចែកសម្ភារៈសិក្សា ដល់សិស្សានុសិស្សនៅទីនោះផងដែរដើម្បីចូលរួមជំរុញការសិក្សារបស់ប្អូនៗ។

ខេត្តកណ្តាល៖ ធនាគារ KB Kookmin Bank ដែលជាធនាគារឈានមុខគេនៅប្រទេសកូរ៉េ និងជាភាគទុនិករបស់ធនាគារ ខេប៊ីប្រាសាក់ បានរៀបចំពិធីប្រគល់ទទួលអគារបណ្ណាល័យ 1 ខ្នងជូនសាលាបឋមសិក្សា និងអនុវិទ្យាល័យដំណាក់អំពិល ស្ថិតនៅស្រុកអង្គស្នួល ខេត្តកណ្តាល នាថ្ងៃទី 21 ខែមីនា ឆ្នាំ 2025 ក្រោមអធិបតីភាពដ៏ខ្ពង់ខ្ពស់របស់ឯកឧត្តម កែ សុវណ្ណ អនុរដ្ឋលេខាធិការ​ ក្រសួងការបរទេស​និងសហប្រតិបត្តិការអន្តរជាតិ។ អគារបណ្ណាល័យនេះប្រសូតឡើងពីការឧបត្ថម្ភរបស់បុគ្គលិ​កធនាគារ​ គូកមីន​ សហគមន៍​ និងដៃគូពាក់ព័ន្ធ ព្រមជាមួយនឹងការចូលរួមបញ្ចប់សាងសង់ដោយផ្ទាល់ពីបុគ្គលិកធនាគារ គូកមីន ប្រមាណជាជាង 30 នាក់។

ក្រៅពីការចូលរួមដោយក្រុមស្ម័គ្រចិត្តនៃបុគ្គលិកធនាគារ គូកមីន ក្នុងការបង្កើនសោភណភាពបណ្ណាល័យ និងសាលារៀន តាមរយៈការលាបថ្នាំពណ៌ និងគូរគំនូរលើជញ្ជាំង ក្រុមការងារនេះក៏បានចូលរួមក្នុងសកម្មភាពផ្លាស់ប្តូរវប្បធម៌ជាមួយសិស្សានុសិស្ស និងលោកគ្រូ អ្នកគ្រូ ដោយរៀបចំឱ្យមានការលេងល្បែងប្រពៃណីកូរ៉េ ដូចជា ទាត់សី (Jegichagi) និង បោះព្រួញ (Tuho) ជាដើម។

នៅក្នុងពិធីនេះ ថ្នាក់ដឹកនាំ​ ធនាគារ ខេប៊ីប្រាសាក់ បានថ្លែងអំណរគុណយ៉ាងជ្រាលជ្រៅចំពោះធនាគារ KB Kookmin Bank នៅប្រទេសកូរ៉េ និងភាគីពាក់ព័ន្ធដែលបានឧបត្ថម្ភការសាងសង់បណ្ណាល័យនៅសាលាដំណាក់អំពិលនេះ។ ការសាងសង់បញ្ចប់ដោយជោគជ័យ និងការប្រគល់ទទួលអគារបណ្ណាល័យ នេះគឺឆ្លុះបញ្ចាំងពីការប្តេជ្ញាចិត្តរបស់ធនាគារ KB Kookmin Bank ចំពោះការចូលរួមអភិវឌ្ឍវិស័យអប់រំ និងការគាំទ្រសហគមន៍នៅកម្ពុជា។ លោកក៏សង្ឃឹមផងដែរថា សិស្សានុសិស្ស នឹងប្រើប្រាស់បណ្ណាល័យនេះឱ្យអស់លទ្ធភាពក្នុងការទាញយកចំណេះវិជ្ជាពីការអានសៀវភៅ និងការសិក្សាស្រាវជ្រាវនានា ដើម្បីជាប្រយោជន៍សម្រាប់អនាគត ព្រមទាំងចូលរួមក្នុងការថែរក្សាសមិទ្ធផលដ៏ថ្លៃថ្លានេះ។

ថ្នាក់ដឹកនាំរបស់ធនាគារ KB Kookmin Bank បានមានប្រសាសន៍ថា “យើងសង្ឃឹមថាប្រជាជន និងយុវជនកម្ពុជា នឹងរីករាយនឹងឱកាសទទួលបានចំណេះដឹង និងការសិក្សានៅក្នុងបណ្ណាល័យ KB ដើម្បីទទួលបានបទពិសោធន៍អំពីពិភពលោកកាន់តែទូលំទូលាយតាមរយៈសៀវភៅ និងបង្កើនសុបិននិងក្តីសង្ឃឹម”។

គួរកត់សម្គាល់ថា ធនាគារ KB Kookmin Bank ក៏ធ្លាប់បានឧបត្ថម្ភក្នុងកិច្ចការងារសង្គមនៅកម្ពុជារួមមាន ការសាងសង់អគារបណ្ណាល័យ ការឧបត្ថម្ភការព្យាបាលជំងឺបេះដូងដល់កុមារកម្ពុជា ការចូលរួមឧបត្ថម្ភថវិកាជូនមូលនិធិអាហារូបករណ៍សម្តេចតេជោ ជាដើម។

ខេត្តសៀមរាប៖ ធនាគារ ខេប៊ីប្រាសាក់ មានមោទនភាពក្នុងការគាំទ្រដល់បេសកកម្មវះកាត់របស់អង្គការស្នាមញញឹមកម្ពុជា ក្នុងកញ្ចប់ជា Gold Sponsor ដែលបានបង្ហាញពីការប្តេជ្ញាចិត្តរបស់ធនាគារចំពោះ ទំនួលខុសត្រូវសង្គម និងការបង្កើតឥទ្ធិពលជាវិជ្ជមាន និងមានអត្ថន័យដល់សហគមន៍កម្ពុជា។

កម្មវិធីនេះ ដែលធ្វើឡើងពីថ្ងៃទី 13 ដល់ 15 ខែមីនា ឆ្នាំ 2025 នៅមន្ទីរពេទ្យខេត្តសៀមរាប ផ្ដល់ជូននូវការវះកាត់ និងព្យាបាលដោយឥតគិតថ្លៃដល់កុមារកម្ពុជា ដែលបបូរមាត់ឆែប ក្រអូមមាត់ឆែប និងពិការភាពមុខមាត់ផ្សេងៗពីកំណើត។ គំនិតផ្តួចផ្តើមនេះ មិនត្រឹមតែមានគោលបំណងស្ដារនូវស្នាមញញឹមរបស់កុមារប៉ុណ្ណោះទេ ប៉ុន្តែថែមពង្រឹងនូវទំនុកចិត្ត និងគុណភាពជីវិតរបស់ពួកគេផងដែរ។

អង្គការស្នាមញញឹមកម្ពុជា ដែលជាផ្នែកមួយរបស់អង្គការស្នាមញញឹមអាស៊ី ទទួលបានការរួមសហការពី អ្នកស្ម័គ្រចិត្តផ្នែកវេជ្ជសាស្ត្រអន្តរជាតិមកពីអង្គការអនាគតស្នាមញញឹមចិន និង BEAM Hong Kong បានសហការជាមួយអ្នកជំនាញវេជ្ជសាស្ត្រកម្ពុជា ដើម្បីផ្តល់ការវះកាត់ជួយកែប្រែជីវិតនេះជូនកុមារដែលមានតម្រូវការ។

ធនាគារ ខេប៊ីប្រាសាក់ មានកិត្តិយសក្នុងការគាំទ្រដល់បុព្វហេតុដ៏ថ្លៃថ្លានេះ។ ធនាគារ ខេប៊ីប្រាសាក់ តែងតែតបស្នងសង្គម ហើយនឹងបន្តគាំទ្រគំនិតផ្តួចផ្តើមទាំងឡាយណាដែលបានរួមចំណែកដល់សុខុមាលភាពរបស់សហគមន៍កម្ពុជា។

ភ្នំពេញ៖ ធនាគារ ខេប៊ីប្រាសាក់ មានមោទនភាពក្នុងការឧបត្ថម្ភ ទិវាជាតិអំណាន ឆ្នាំ 2025 ដែលប្រារព្ធឡើងពីថ្ងៃទី 8 ដល់ថ្ងៃទី 11 ខែមីនា នៅវិទ្យាស្ថានបច្ចេកវិទ្យាកម្ពុជា ឬហៅថា សាលាតិចណូ ក្រោមប្រធានបទ “ការអានផ្សារភ្ជាប់អន្តរជំនាន់មនុស្សក្នុងសង្គម”។ ការឧបត្ថម្ភនេះឆ្លុះបញ្ចាំងពីការប្តេជ្ញាចិត្តមិនផ្លាស់ប្តូររបស់ធនាគារក្នុងការលើកកម្ពស់ការអប់រំ និងលើកកម្ពស់វប្បធម៌អាន នៅទូទាំងប្រទេសកម្ពុជា។

ក្នុងឱកាសនោះដែរ ធនាគារ ខេប៊ីប្រាសាក់ បានរៀបចំជាស្តង់ពិព័រណ៍ដើម្បីចូលរួមចំណែកក្នុងការជំរុញបរិយាប័ន្នហិរញ្ញវត្ថុ តាមរយៈការចែករំលែកចំណេះដឹងហិរញ្ញវត្ថុក្នុងយុគសម័យឌីជីថល ក៏ដូចជាជំរុញការសន្សំ និងការគ្រប់គ្រងការចាយវាយតាមរយៈគណនីសន្សំ និងការប្រើប្រាស់អេបធនាគារ ខេប៊ីប្រាសាក់ ផងដែរ។

ជាលទ្ធផលនៃការរួមចំណែករបស់ធនាគារ ខេប៊ីប្រាសាក់  ក្នុងការពង្រឹងធនធានមនុស្ស អគារបណ្ណាល័យចំនួន 47 នៅតាមបណ្ដាខេត្តត្រូវបានសាងសង់ និងបំពាក់សម្ភារៈស្របតាមបទដ្ឋានក្រសួងអប់រំ និងផ្តល់ឱកាសឱ្យសិស្សានុសិស្ស និងសហគមន៍នូវលទ្ធភាពទទួលបានចំណេះដឹង និងធនធានសិក្សាកាន់តែប្រសើរឡើង។

ភ្នំពេញ ថ្ងៃទី 7 ខែមីនា ឆ្នាំ 2025 ៖ ដោយបង្ហាញពីការប្តេជ្ញាចិត្តចំពោះទំនួលខុសត្រូវសង្គម ធនាគារ ខេប៊ីប្រាសាក់ បានឧបត្ថម្ភយុទ្ធនាការ “បរិច្ចាគឈាមសង្គ្រោះជីវិត” ហើយក្នុងនោះ ក៏មានការស្ម័គ្រចិត្តបរិច្ចាគឈាមរបស់ថ្នាក់ដឹកនាំ និងបុគ្គលិកផងដែរ។ គំនិតផ្តួចផ្តើមដ៏មានអត្ថន័យនេះ ត្រូវបានសហការរៀបចំដោយសមាគមធនាគារនៅកម្ពុជា និងមជ្ឈមណ្ឌលជាតិផ្តល់ឈាម និងបានធ្វើឡើងនៅវិទ្យាស្ថានសិក្សាបច្ចេកទេសធនាគារ រាជធានីភ្នំពេញ។

យុទ្ធនាការនេះ មានគោលបំណងបំពេញការផ្គត់ផ្គង់ឈាមប្រកបដោយសុវត្ថិភាពរបស់សហគមន៍ និងលើកកម្ពស់ការយល់ដឹងអំពីសារៈសំខាន់នៃការបរិច្ចាគឈាមជាអំណោយសង្រ្គោះជីវិត។ ជាមួយនឹងការកើនឡើងនៃតម្រូវការឈាមនៅក្នុងមន្ទីរពេទ្យនានាទូទាំងប្រទេសកម្ពុជា ធនាគារ ខេប៊ីប្រាសាក់ មានមោទនភាពក្នុងការរួមចំណែកដល់បុព្វហេតុដ៏សំខាន់នេះ និងលើកទឹកចិត្តឱ្យមានការចូលរួមកាន់តែច្រើនក្នុងសកម្មភាពស្រដៀងគ្នានេះ។

ថ្នាក់ដឹកនាំម្នាក់របស់ធនាគារ ខេប៊ីប្រាសាក់ បានមានប្រសាសន៍ថា “ក្នុងនាមជាស្ថាប័នដែលមានទំនួលខុសត្រូវ ធនាគារខេប៊ីប្រាសាក់ មានកិត្តិយសដែលបានចូលរួមក្នុងបុព្វហេតុដ៏ពិសិដ្ឋនេះ។ ការបរិច្ចាគឈាមគឺជាទង្វើសាមញ្ញ ប៉ុន្តែមានឥទ្ធិពលដែលអាចជួយសង្គ្រោះជីវិតបាន ហើយយើងប្តេជ្ញាគាំទ្រសហគមន៍របស់យើងតាមរយៈគំនិតផ្តួចផ្តើមប្រកបដោយផលវិជ្ជមាននេះ”។

ធនាគារ ខេប៊ីប្រាសាក់ បន្តប្តេជ្ញាចិត្តក្នុងការផ្តល់ត្រឡប់ទៅកាន់សង្គមវិញ ហើយនឹងបន្តចូលរួមក្នុងសកម្មភាពទំនួលខុសត្រូវសង្គម (CSR) ផ្សេងៗដែលផ្ដល់ការផ្លាស់ប្តូរប្រកបដោយអត្ថន័យសម្រាប់ជីវិតមនុស្សម្នាក់ៗ។

យើងខ្ញុំមានសេចក្តីរីករាយនិងកិត្តិយសដ៏ធំធេង និងសូមស្វាគមន៍យ៉ាងកក់ក្ដៅ ចំពោះវត្ដមានដ៏ខ្ពង់ខ្ពស់របស់ ឯកឧត្ដម យឹម លាត ទេសាភិបាលរង ធនាគារជាតិនៃកម្ពុជា អមជាមួយថ្នាក់ដឹកនាំ និងសហការី ធនាគារជាតិនៃកម្ពុជា ជាច្រើនរូប ក្នុងដំណើរបំពេញទស្សនកិច្ចផ្លូវការ មកកាន់ការិយាល័យកណ្ដាលនៃ ធនាគារ ខេប៊ីប្រាសាក់ ម.ក កាលពីថ្ងៃទី 5 ខែកុម្ភៈ ឆ្នាំ 2025 ។

យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះដំបូន្មាន និងការគាំទ្រ យ៉ាងខ្ជាប់ខ្ជួនចំពោះបេសកកម្មរបស់ធនាគារយើងខ្ញុំលើកិច្ចការងារបរិយាប័ន្នហិរញ្ញវត្ថុ កិច្ចការពារអតិថិជន ចំណេះដឹងហិរញ្ញវត្ថុ និងការលើកកម្ពស់ការប្រើប្រាស់ប្រាក់រៀល។ យើងខ្ញុំតែងត្រៀមខ្លួនគាំទ្រនូវគំនិតផ្តួចផ្តើមនានា របស់ធនាគារជាតិនៃកម្ពុជា ក្នុងការជំរុញការអភិវឌ្ឍសេដ្ឋកិច្ចប្រទេសកម្ពុជា។

ធនាគារ ខេប៊ីប្រាសាក់ មានសេចក្តីសោមនស្សរីករាយក្នុងការប្រកាសពីកិច្ចសហការជាមួយអគ្គនាយកដ្ឋានពន្ធដារ ដើម្បីផ្តល់ជូនសេវាបង់ពន្ធដោយងាយស្រួល និងសុវត្ថិភាព នៅតាមបញ្ជរសាខាសំខាន់ៗរបស់ធនាគារនៅទូទាំងប្រទេស។

ឥឡូវនេះ អតិថិជនរបស់ធនាគារ ខេប៊ីប្រាសាក់ អាចបំពេញកាតព្វកិច្ចបង់ពន្ធរបស់ខ្លួន នូវពន្ធដូចខាងក្រោម៖

• ពន្ធលើមធ្យោបាយដឹកជញ្ជូន
• ពន្ធលើអចលនទ្រព្យ
• ពន្ធសហគ្រាស ដែលរួមមាន ពន្ធប្រចាំខែ (ពន្ធលើប្រាក់បៀវត្ស ពន្ធកាត់ទុក ប្រាក់រំដោះពន្ធ ពន្ធលើតម្លៃបន្ថែម) និងពន្ធប្រចាំឆ្នាំ (ពន្ធលើប្រាក់ចំណេញ ពន្ធប៉ាតង់ជាដើម)។
• ពន្ធផ្សេងៗ

ធនាគារបានរៀបចំឱ្យមានបញ្ជរសម្រាប់តែទទួលការងារបង់ពន្ធ ដោយមិនគិតថ្លៃសេវា ដើម្បីផ្តល់ជូននូវភាពងាយស្រួល និងកាន់តែលឿនរហ័សសម្រាប់អតិថិជនជាបុគ្គល និងក្រុមហ៊ុន/អាជីវកម្ម។

នៅពេលអនាគតដ៏ខ្លីខាងមុខនេះ ធនាគារ ខេប៊ីប្រាសាក់ គ្រោងនឹងធ្វើឱ្យកាន់តែប្រសើរឡើងបន្ថែមទៀត ដោយពង្រីកសេវាបង់ពន្ធទៅកាន់ថ្នាលឌីជីថល រួមមានកម្មវិធី ខេប៊ីប្រាសាក់ម៉ូបាល និង សេវាខេប៊ីប្រាសាក់ខបភើរេត។ ការផ្ដល់ជូនដ៏ពិសេសនេះ នឹងផ្តល់ឱ្យអតិថិជននូវមធ្យោបាយកាន់តែងាយស្រួល សុវត្ថិភាព និងអាចប្រើប្រាស់បានក្នុងការបំពេញកាតព្វកិច្ចពន្ធ គ្រប់ពេលវេលា គ្រប់ទីកន្លែង។

ក្នុងនាមជាតួអង្គសំខាន់មួយក្នុងការរួមចំណែកអភិវឌ្ឍសេដ្ឋកិច្ច-សង្គមរបស់កម្ពុជា ធនាគារ ខេប៊ីប្រាសាក់ ទទួលស្គាល់តួនាទីសំខាន់នៃការអនុលោមពន្ធក្នុងការជំរុញកំណើនជាតិ។ ធនាគារត្រូវបានទទួលស្គាល់ថាជាសហគ្រាសមួយដែលបង់ពន្ធច្រើនជាងគេ ដែលទទួលបានលិខិតសរសើរពីសម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា និងឯកឧត្តម គង់ វិបុល អគ្គនាយកនៃអគ្គនាយកដ្ឋានពន្ធដារ។ លិខិតសរសើរទាំងនេះ បង្ហាញពីការប្តេជ្ញាចិត្តយ៉ាងខ្ជាប់ខ្ជួនរបស់ធនាគារចំពោះតម្លាភាព និងអភិបាលកិច្ចពន្ធសាជីវកម្មដ៏ល្អ។

សូមជម្រាបជូនថា ធនាគារ ខេប៊ីប្រាសាក់ បានទទួលវិញ្ញាបនបត្រស្ដីពីការអនុលោមពន្ធពីអគ្គនាយកដ្ឋានពន្ធដារកម្រិត “មាស” ចាប់តាំងពីវិញ្ញាបនបត្រនេះត្រូវបានបង្កើតឡើងមកម្ល៉េះ។

សម្រាប់ព័ត៌មានបន្ថែម សូមចូលទៅកាន់ សេវាបង់ពន្ធ ឬទូរស័ព្ទមកលេខ 086 999 911 ឬ 023 999 911 ។

សៀមរាប ថ្ងៃទី 25 ខែមករា ឆ្នាំ 2025៖ ធនាគារ ខេប៊ីប្រាសាក់ បានរួមចំណែកជាមួយអាជ្ញាធរជាតិអប្សរាក្នុងសកម្មភាពដាំកូនឈើនៅតំបន់រមណីយដ្ឋានអង្គរ ដើម្បីចូលរួមក្នុងការបង្កើនគម្របពណ៌បៃតង និងគាំទ្រដល់ការអភិរក្សតំបន់បេតិកភណ្ឌពិភពលោកដ៏ល្បីល្បាញរបស់អង្គការយូណេស្កូ។

ព្រឹត្តិការណ៍នេះបានរៀបចំឡើងបន្ទាប់ពី ធនាគារ ខេប៊ីប្រាសាក់ បានបញ្ចប់កម្មវិធីសិក្ខាសាលាប្រចាំឆ្នាំរបស់ខ្លួនប្រកបដោយជោគជ័យក្នុងការដាក់ចេញនូវទិសដៅផែនការយុទ្ធសាស្ត្រធុរកិច្ចឆ្នាំ 2025 ជាមួយនឹងកំណើនប្រកបដោយនិរន្តរភាព និងឧត្តមភាពក្នុងការផ្តល់សេវាហិរញ្ញវត្ថុយ៉ាងសម្បូរបែបជូនដល់អតិថិជន​ និងសាធារណជន។

ក្នុងនាមជាធនាគារធំមួយ និងមានស្ថិរភាពនៅកម្ពុជា ធនាគារ ខេប៊ីប្រាសាក់ ប្តេជ្ញាជំរុញកំណើនសេដ្ឋកិច្ច ក៏ដូចជាបន្តអនុវត្តសកម្មភាពការងារសង្គម ព្រមទាំងរួមចំណែកដល់ការអភិរក្សបរិស្ថាន និងបេតិកភណ្ឌវប្បធម៌របស់យើង។ យើងមានមោទនភាពក្នុងការសហការជាមួយអាជ្ញាធរជាតិអប្សរា ​ក្នុង​ការ​ការពារ​សម្រស់​ធម្មជាតិ​នៃតំបន់ប្រាសាទ​អង្គរ និង​ពង្រឹង​ការ​ប្តេជ្ញាចិត្ត​របស់​យើង​ក្នុង​ទំនួលខុសត្រូវ​សង្គម​របស់ស្ថាប័ន។

ភ្នំពេញ ថ្ងៃទី 1 ខែមករា ឆ្នាំ 2025 ៖ ធនាគារ ខេប៊ីប្រាសាក់ មានសេចក្តីសោមនស្សរីករាយក្នុងការដាក់ឱ្យដំណើរការសេវាបង់ប្រាក់ថ្លៃធ្វើដំណើរតាមផ្លូវល្បឿនលឿនភ្នំពេញ-ក្រុងព្រះសីហនុ តាមកម្មវិធី ខេប៊ីប្រាសាក់ម៉ូបាល (KB PRASAC Mobile) ។ សេវានេះអនុញ្ញាតឱ្យអតិថិជនជាអ្នកធ្វើដំណើរអាចឆ្លងកាត់ច្រកចេញ-ចូលផ្លូវល្បឿនលឿន ដោយប្រើប្រាស់គន្លងផ្លូវ ANPR និង ETC បានយ៉ាងងាយស្រួល និងមិនបាច់រង់ចាំ។ មធ្យោបាយទូទាត់ថ្មីនេះ សបង្ហាញពីការប្តេជ្ញាចិត្តរបស់ធនាគារ ខេប៊ីប្រាសាក់ ក្នុងការបង្កើនភាពងាយស្រួលដល់អតិថិជន និងសម្រួលការធ្វើប្រតិបត្តិការហិរញ្ញវត្ថុក្នុងបរិបទនៃការរីកចម្រើនហេដ្ឋារចនាសម្ព័ន្ធ និងសេវាឌីជីថលនៅកម្ពុជា។

បញ្ចូលទឹកប្រាក់ទូទាត់មុនដោយភាពងាយស្រួល៖ អតិថិជនដែលប្រើប្រាស់កម្មវិធី KB PRASAC Mobile អាចធ្វើការបញ្ចូលលុយទុកជាមុនសម្រាប់សមតុល្យផ្លាកលេខយានជំនិះរបស់ខ្លួន ឬ ញាតិមិត្តដោយផ្ទាល់ តាមកម្មវិធី KB PRASAC Mobile ។ ទឹកប្រាក់ថ្លៃធ្វើដំណើរនឹងត្រូវបានកាត់ដោយស្វ័យប្រវត្តិ ទៅតាមចម្ងាយផ្លូវធ្វើដំណើរ និងប្រភេទយានជំនិះនៅច្រកចេញ។ អតិថិជនអាចបញ្ចូលទឹកប្រាក់រហូតដល់ 1,000  ដុល្លារ ទៅក្នុងសមតុល្យផ្លាកលេខយានជំនិះរបស់ខ្លួន ដែលជួយសម្រួលដល់ការធ្វើដំណើរគ្រប់ពេលបានយ៉ាងរហ័ស។

របៀបបញ្ចូលទឹកប្រាក់សមតុល្យជាមុន តាមកម្មវិធី KB PRASAC Mobile ៖ ជាដំបូងលោកអ្នកចូលទៅក្នុងអេប ខេប៊ីប្រាសាក់ម៉ូបាល រួចអនុវត្តបន្តដូចខាងក្រោម៖

1. ចុចលើ Payments
2. ចុចលើ Public Services និងជ្រើសយក PPSHV Expressway
3. ជ្រើសយកប្រភេទ និងបញ្ចូលផ្លាកលេខយានជំនិះ
4. បញ្ចូលចំនួនទឹកប្រាក់តាមតាមការចង់បាន
5. ចុចលើ Pay និងចុចលើ Confirm

មិនទាន់មាន KB PRASAC Mobile ? លោកអ្នកអាចទាញយក កម្មវិធី KB PRASAC Mobile នេះមកដាក់នៅលើស្មាតហ្វូនរបស់លោកអ្នក រួចបើកគណនីសន្សំបានដោយខ្លួនឯង រួចធ្វើការបញ្ចូលទឹកប្រាក់ដើម្បីទូទាត់ថ្លៃធ្វើដំណើរឆ្លងកាត់ផ្លូវល្បឿនលឿនភ្នំពេញ-ក្រុងព្រះសីហនុ មុនពេលចេញដំណើរបានភ្លាមៗ។

ស្វែងយល់ពីច្រកផ្លូវ ANPR និង ETC ៖ ANPR គឺជាច្រកអាទិភាពសម្រាប់ការទូទាត់ប្រាក់ដោយស្វ័យប្រវត្តិតាមរយៈផ្លាកលេខរថយន្ត។ អតិថិជនត្រូវបញ្ចូលទឹកប្រាក់ជាមុន ដោយមិនចាំបាច់យកកាតនៅច្រកចូលឡើយ។ ទឹកប្រាក់នឹងកាត់ចេញដោយស្វ័យប្រវត្តិពីគណនីសន្សំរបស់លោកអ្នកនៅខេប៊ីប្រាសាក់ នៅច្រកចេញផ្លូវល្បឿនលឿន។ រីឯ ETC គឺជាច្រកអាទិភាពមួយផ្សេងទៀតនៃបញ្ជរបង់ប្រាក់ផ្លូវល្បឿនលឿនភ្នំពេញ-ក្រុងព្រះសីហនុ ហើយមានរបាំងបើក-បិទដោយស្វ័យប្រវត្តិ ដើម្បីឱ្យយានយន្តចូល-ចេញបាន។ ដើម្បី ចូល-ចេញ ច្រកនេះបាន អ្នកបើកបរត្រូវមានបំពាក់ឧបករណ៍ OBU នៅលើកញ្ចក់រថយន្តផ្នែកខាងមុខជាដាច់ខាត ប្រសិនបើរថយន្តរបស់បងប្អូនដែលមិនបានបំពាក់ឧបករណ៍ OBU នោះទេ គឺមិនអាចចូល-ចេញ “ច្រក ETC” នេះបានឡើយ បើទោះបីជាបានបញ្ចូលទឹកប្រាក់ទៅក្នុងផ្លាកលេខជាមុនក៏ដោយ។

សម្រាប់ព័ត៌មានបន្ថែម សូមចូលទៅកាន់ សេវាបង់ប្រាក់ផ្លូវល្បឿនលឿន ភ្នំពេញ-ក្រុងព្រះសីហនុ ឬទូរស័ព្ទមកលេខ 086 999 911 ឬ 023 999 911 ។

ភ្នំពេញថ្ងៃទី 25 ខែធ្នូ ឆ្នាំ 2024 ៖ ធនាគារ ខេប៊ីប្រាសាក់ មានសេចក្តីសោមនស្សរីករាយក្នុងការដាក់ឱ្យដំណើរការសេវាបង់ភាគទានមក ប.ស.ស. សម្រាប់សហគ្រាស និងគ្រឹះស្ថាននានា តាមរយៈ ខេប៊ីប្រាសាក់ម៉ូបាល (KB PRASAC Mobile) និង ខេប៊ីប្រាសាក់ខបភើរេត (KB PRASAC Corporate) ។ គ្រប់សហគ្រាស និងគ្រឹះស្ថាន អាចបង់ភាគទាន ប.ស.ស. សម្រាប់បុគ្គលិក និយោជិត និងកម្មកររបស់ខ្លួន បានយ៉ាងងាយស្រួល។

ជាមួយនឹងមុខងារថ្មីនេះ អតិថិជន ដែលជាសហគ្រាស និងគ្រឹះស្ថាន អាចប្រើប្រាស់សេវាប្រកបដោយភាពច្នៃប្រឌិតនេះ ដើម្បីសម្រួលដំណើរការទូទាត់ បង្កើនប្រសិទ្ធភាព និងសុវត្ថិភាពសាច់ប្រាក់សម្រាប់ធុរកិច្ចរបស់ខ្លួនផងដែរ។ តាមរយៈមធ្យោបាយឌីជីថលរបស់ធនាគារខេប៊ីប្រាសាក់នេះ កម្រៃសេវាក្នុងការបង់ភាគទានមក ប.ស.ស.  របស់សហគ្រាស និងគ្រឹះស្ថាន ត្រូវបានលើកលែង។

ការផ្តល់ជូននូវសេវានេះឆ្លុះបញ្ចាំងពីការខិតខំប្រឹងប្រែងជាបន្តរបស់ធនាគារ ខេប៊ីប្រាសាក់ ក្នុងការប្រើប្រាស់នវានុវត្តន៍ឌីជីថលដើម្បីបំពេញតម្រូវការរបស់អតិថិជន និងចូលរួមចំណែកដល់ប្រព័ន្ធអេកូឡូហ្ស៊ីផ្នែកហិរញ្ញវត្ថុឱ្យកាន់តែងាយស្រួល ទំនើប សុវត្ថិភាព និងជំរុញដល់ការរីកចម្រើននៃកម្លាំងធុរកិច្ចនៅក្នុងប្រទេសកម្ពុជា។

សម្រាប់ព័ត៌មានបន្ថែម សូមចូលទៅកាន់ បង់ភាគទានមក ប.ស.ស. សម្រាប់សហគ្រាស ឬទូរស័ព្ទមកលេខ 098 999 911 ឬ 023 999 911។

ខេត្តកំពត ប្រទេសកម្ពុជា៖ ធនាគារ ខេប៊ីប្រាសាក់ មានសេចក្តីសោមនស្សរីករាយក្នុងការចូលរួម ពិធីបុណ្យសមុទ្រ ដែលប្រារព្ធឡើងពីថ្ងៃទី 13 ដល់ 15 ខែធ្នូ ឆ្នាំ 2024 នៅខេត្តកំពត ដែលជាពិធីដ៏អធិកអធម ក្នុងគោលបំណងលើកកម្ពស់ផលិតផលក្នុងស្រុក បង្ហាញពីសក្តានុពលទេសចរណ៍ប្រទេសកម្ពុជា និងបង្ហាញពីឱកាសអេកូទេសចរណ៍​​ តាមតំបន់ឆ្នេរដ៏ស្រស់ស្អាត។ ព្រឹត្តិការណ៍ប្រចាំឆ្នាំនេះ ឆ្លុះបញ្ចាំងពីស្មារតីនៃកិច្ចសហការ និងការច្នៃប្រឌិតក្នុងការជំរុញកំណើនសេដ្ឋកិច្ចប្រកបដោយចីរភាព និងមោទនភាពវប្បធម៌។

នៅក្នុងពិធីបុណ្យនេះ ធនាគារ ខេប៊ីប្រាសាក់ រៀបចំស្តង់ដើម្បីអាចឱ្យភ្ញៀវទេសចរអាចទទួលបានចំណេះដឹងលើការប្រើប្រាស់សេវាហិរញ្ញវត្ថុដែលសមស្របតាមតម្រូវការ ព្រមទាំងការពិគ្រោះយោបល់លើផលិតផល និងសេវាហិរញ្ញវត្ថុរបស់ធនាគារ ខេប៊ីប្រាសាក់ ផងដែរ។ បន្ថែមពីនេះ ធនាគារ ក៏បានចូលរួមក្នុងការជំរុញបរិយាប័ន្នហិរញ្ញវត្ថុ និងបង្កើតទម្លាប់សន្សំជាមួយគ្រឹះស្ថានហិរញ្ញវត្ថុផ្លូវការតាមរយៈការផ្តល់ជូនការបើកគណនីឌីជីថល ជាមួយនឹងប្រូម៉ូសិនដែលផ្តល់រង្វាន់ជាសាច់ប្រាក់ និងវត្ថុអនុស្សាវរីយ៍ជាច្រើនផងដែរ។

ជាផ្នែកមួយនៃការយកចិត្តទុកដាក់ចំពោះការអភិវឌ្ឍប្រកបដោយចីរភាព ធនាគារ ខេប៊ីប្រាសាក់ ក៏កំពុងលើកកម្ពស់ការផ្តល់ប្រាក់កម្ចីបៃតង ដែលជំរុញការវិនិយោគប្រកបដោយការទទួលខុសត្រូវចំពោះបរិស្ថាន និងផ្តល់ផលប្រយោជន៍ទាំងអតិថិជន និងភពផែនដី។

ខេត្តបន្ទាយមានជ័យ ថ្ងៃទី 09 ខែ ធ្នូ ឆ្នាំ 2024៖ ធនាគារ ខេប៊ីប្រាសាក់ ប្រកាសដាក់ឱ្យដំណើរការជាបឋមនូវបណ្ណាល័យទី 46 របស់ខ្លួននៅសាលាបឋមសិក្សាទឹកជោរ ស្ថិតក្នុងភូមិទឹកជោ ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ។ សកម្មភាពនេះស្របឆ្លុះបញ្ចាំងពីកិច្ចខិតខំប្រឹងប្រែងផ្នែកទំនួលខុសត្រូវសង្គមឥតឈប់ឈររបស់ធនាគារក្នុងបណ្ដុះសេចក្ដីស្រឡាញ់ក្នុងការអានក្នុងចំណោមយុវជនកម្ពុជា និងគាំទ្រដល់ការអភិវឌ្ឍការអប់រំនៅក្នុងសហគមន៍មូលដ្ឋាន។

បណ្ណាល័យដែលទើបកសាងថ្មីនេះ ត្រូវបានបំពាក់ដោយសៀវភៅនិងសម្ភារៈអប់រំប្រកបដោយគុណភាពជាច្រើន ដើម្បីបំផុសទឹកចិត្តសិស្សក្នុងការខិតខំប្រឹងប្រែងសិក្សា និងលើកកម្ពស់ទម្លាប់សិក្សាពេញមួយជីវិត។ ធនាគារ ខេប៊ីប្រាសាក់ ប្តេជ្ញាផ្តល់សម្ភារៈធនធានដែលជំរុញឱកាសសិក្សា ដែលរួមចំណែកដល់ការរីកលូតលាស់ និងការបង្កើនសមត្ថភាពដល់មនុស្សជំនាន់ក្រោយ។

សូម​បញ្ជាក់​ថា​ ​គិត​ត្រឹម​ខែ​ធ្នូ​ ​ឆ្នាំ​ 2024 ​នេះ​ ​គម្រោង​បណគម្រោងបណ្ណាល័យខេប៊ីប្រាសាក់​ដាក់​ឱ្យ​ប្រើប្រាស់​ចំនួន​ 46 ​អគារ​គ្របដណ្តប់​លើ​ភូមិ​ចំនួន​ 499 ​ភូមិ ​ដែល​មាន​ចំនួន​គ្រួសារ​សរុប​ 108,810 ​គ្រួសារ​ ​មាន​ប្រជាជន​សរុប​ចំនួន​ 446,427 ​នៅ​ក្នុង​ 14 ​ខេត្ត​រួម​មាន​ កំពង់ស្ពឺ​ ​កំពង់ចាម​ ​កណ្ដាល​ ​ព្រៃវែង​ ​កំពង់ធំ​ ​សៀមរាប​ ​តាកែវ​ ​ព្រះវិហារ​ ​បាត់​ដំបង​ ​ស្វាយរៀង​ ​បន្ទាយ​មានជ័យ​ ​កែប​ ​ពោធិ៍សាត់ និងត្បូងឃ្មុំ ហើយ​មាន​សិស្សានុសិស្ស​ដែល​ទទួល​ផល​ផ្ទាល់​ពី​គម្រោង​បណ្ណាល័យ​នេះ​ចំនួន​ 171,485 ​នាក់​។​